कंत्राटी कर्मचा-यांना दिवाळीपूर्वी 28 ऑक्टोबरपर्यंत बोनस व ऑक्टोबरचे वेतन अदा करण्याचे आयुक्तांचे निर्देश
दिवाळी सणाच्या पार्श्वभूमीवर नवी मुंबई महानगरपालिका अधिकारी, कर्मचारीवृंदास दिवाळीपूर्वीच सानुग्रह अनुदान तसेच ऑक्टोबर महिन्याचे वेतन अदा करणेबाबत महापालिका आयुक्त श्री. अभिजीत बांगर यांनी सर्व विभागप्रमुख व कार्यालय प्रमुख यांस निर्देश दिले आहेत.
त्यासोबतच महानगरपालिकेच्या विविध विभागांत कार्यरत कंत्राटी कामगार तसेच ठेकेदाराकडील कर्मचारी यांचीही दिवाळी आनंदात जावी यादृष्टीने आयुक्तांनी सन 2020-21 या आर्थिक वर्षाकरिता विहित मुदतीत बोनस व रजा रोखीकरण रक्कम तसेच ऑक्टोबर महिन्याचे मासिक वेतन 28 ऑक्टोबरपूर्वी अदा करणेबाबतचे आदेश निर्गमित केले आहेत.
सदर आदेशान्वये सर्व कंत्राटी कामगार व ठेकेदाराकडील कर्मचा-यांना 2 नोव्हेंबर पासून सुरू होणा-या दिवाळीआधीच बोनस व रजा रोखीकरण रक्कम तसेच ऑक्टोबर महिन्याचे मासिक वेतन मिळणार असल्याने त्यांच्यामार्फत आनंद व्यक्त केला जात आहे.
