मॉर्निंग वॉकसाठी घराबाहेर पडून नियमांचे उल्लंघन करणा-या 25 जणांवर गुन्हा दाखल
मॉर्निंग वॉकसाठी घराबाहेर पडून नियमांचे उल्लंघन करणा-या 25 जणांवर गुन्हा दाखल
आता मॉर्निंग-इव्हिनींग वॉकसाठी घराबाहेर पडून नियमांचे उल्लंघन करणा-यांची तिथेच अँटिजेन टेस्टींग
पॉझिटिव्ह रिपोर्ट आल्यास कोव्हीड सेंटरमध्ये उपचारासाठी करणार दाखल
कोरोना प्रतिबंधासाठी महाराष्ट्र शासनाच्या वतीने 1 मे रोजी सकाळी 7 वाजेपर्यंत ‘ब्रेक द चेन’ अंतर्गत विविध प्रतिबंध जाहीर करण्यात आले असून नवी मुंबई महानगरपालिकेच्या वतीने त्यावर पोलीस विभागाच्या सहकार्याने लक्ष ठेवले जात आहे. यामध्ये संचारबंदी लागू असूनही काही नागरिक मॉर्निग वॉक अथवा इव्हिनींग वॉकसाठी घराबाहेर पडत असल्याचे निदर्शनास येत आहे.
वास्तविकत: ब्रेक द चेन आदेशानुसार संचारबंदी लागू करण्यात आली असून जीवनावश्यक बाबींव्यतिरिक्त नागरिकांनी घराबाहेर पडणे अपेक्षित नाही. तथापि तरीही काही बेजबाबदार नागरिक या निर्बंधांचे उल्लंघन करताना आढळत असून त्यांच्यावर कायदेशीर कारवाई करण्यात येत आहे. अशाप्रकारे नेरूळ वंडर्स पार्क परिसरात मॉर्निग वॉकच्या बहाण्याने घराबाहेर पडून कोव्हीड नियमांचे उल्लंघन करणा-या 3 व्यक्तींवर कारवाई करण्यात आलेली आहे तसेच ऐरोली सेक्टर 14 येथेही 22 नागरिकांवर कारवाई करण्यात आलेली आहे.
यापुढील काळात मॉर्निंग वॉक, इव्हिनींग वॉक करण्यासाठी घराबाहेर पडून संचारबंदीच्या नियमांचे उल्लंघन करणा-या नागरिकांवर कायदेशीर कारवाई करण्याप्रमाणेच त्यांची तिथेच रॅपीड अँटिजेन टेस्ट करून रिपोर्ट पॉझिटिव्ह आल्यास त्यांना महानगरपालिकेच्या कोव्हीड सेंटरमध्ये दाखल करण्याचा निर्णय महापालिका आयुक्त श्री. अभिजीत बांगर यांनी घेतला असून त्याची त्वरित अंमलबजावणी करण्याचे आदेश सर्व विभाग कार्यालयांचे सहा. आयुक्त यांना दिलेले आहेत.
त्यामुळे यापुढे नवी मुंबई महानगरपालिका क्षेत्रातील मॉर्निंग- इव्हिनींग वॉकच्या सर्व ठिकाणांवर नवी मुंबई महानगरपालिका आणि पोलीसांची करडी नजर असणार असून कोव्हीड नियमांचे उल्लंघन करणा-या बेजबाबदार नागरिकांवर कायदेशीर कारवाई करण्याप्रमाणेच त्यांची कोव्हीड टेस्टही केली जाणार आहे.
